पुनर्बास नगरपालिकाद्वारा शैक्षिक संस्थाहरूको डिजिटल प्रवर्द्धनमा महत्वपूर्ण कदम, विद्यालय वेबसाइट सञ्चालन तालिम सम्पन्न !

कञ्चनपुरको पुनर्बास नगरपालिकामा, शैक्षिक संस्थाहरूको डिजिटल प्रणालीलाई समृद्ध बनाउने उद्देश्यले विद्यालय वेबसाइट सञ्चालन सम्बन्धी एकदिने तालिम सम्पन्न भएको छ। उक्त तालिममा पालिकाभित्र रहेका ३२ वटा सामुदायिक विद्यालयका प्रधानाध्यापकहरू सहभागी भएका थिए ।

उक्त तालिममा विद्यालय वेबसाइटको फ्रन्टएण्ड र ब्याकएण्ड सञ्चालन, सूचना अद्यावधिक गर्ने प्रक्रिया, शिक्षक र कर्मचारी विवरण व्यवस्थापन, सूचना तथा सूचनापाटी प्रकाशन गर्ने विधि जस्ता विषयमा व्यावहारिक प्रशिक्षण प्रदान गरिएको पुनर्वास नगरपालिकाका शिक्षा संयोजक शिवराज भट्टले जानकारी।  दिनुभयो ।

SASA Infosys Pvt. Ltd. द्वारा कार्यान्वयन गरिएको उक्त परियोजनामा कम्पनीका संस्थापक सागर गौतम र तुलसी दाहालले प्रशिक्षण दिनुभएको थियो । तालिमको मुख्य उद्देश्य विद्यालयहरूलाई डिजिटल प्रविधिमा दक्ष बनाउँदै सूचना प्रवाहलाई पारदर्शी, सहज र समयमै उपलब्ध गराउने वातावरण सिर्जना गर्नु रहेको कम्पनीका संस्थापक सागर गौतमले जानकारी दिनुभयो । प्रशिक्षित प्रधानाध्यापकहरूले प्राप्त ज्ञानलाई विद्यालयमा प्रभावकारी रूपमा कार्यान्वयन गर्ने अपेक्षा राखिएको उहाँ बताउनुहुन्छ ।

पुनर्बास नगरपालिकाको शिक्षा शाखा, सूचना प्रविधि शाखा, र SASA Infosys Pvt. Ltd. को सहयोगमा सञ्चालन गरिएको उक्त तालिममा पुनर्बास नगरपालिका शैक्षिक संस्थाहरूलाई प्रविधिमैत्री बनाउन र गुणस्तरीय, पारदर्शी र उत्तरदायी सूचना प्रणालीको विकासमा निरन्तर अग्रसर रहेको पुनर्वास नगरपालिकाका नगरप्रमुख तोय प्रसाद शर्माले बताउनुभयो । विद्यालयहरूलाई डिजिटल प्रणालीको उपयोगमा दक्ष बनाउन नगरपालिकाले यसरी एक कदम अघि बढाएको उहाँ बताउनुहुन्छ ।

यस कार्यक्रमको सफलताले पुनर्बास नगरपालिका शैक्षिक क्षेत्रको डिजिटल प्रवर्धनतर्फ ठूलो कदम चालेको छ, जसबाट सम्पूर्ण नगर क्षेत्रका विद्यालयहरूले लाभ उठाउनेमा दुई मत नरहेको विद्यालयका प्रधानाध्यापकहरूले बताएका छन् ।