हिमालयन लाइफ इन्स्योरेन्स लिमिटेड अत्तरीया शाखाका प्रबन्धक गजेन्द्रबहादुर भण्डारीले आफ्नो सेवा अवधिको १५ औँ वार्षिकोत्सव केही फरक र सामाजिक कार्य गरेर मनाउनु भएको छ । सेवा अबधिको १५ औँ वार्षिकोत्सवमा महँगो होटलमा खानपान गरेर खर्च गर्नुको सट्टा भण्डारीले अत्तरिया स्थित श्री शैलेश्वरी महिला तथा बालबालिका सेवा हाउसमा रहेका असहाय तथा बालबालिकालाई एक छाक मिठो खाना खुवाउनुभएको हो ।

 सेवा अबधिको १५ औँ वार्षिकोत्सवका अवसरमा आयोजित कार्यक्रममा हिमालयन लाइफ इन्स्योरेन्स लिमिटेडका प्रदेश उपप्रमुख परमानन्द पन्तको समेत सहभागिता रहेको थियो। उहाँले आफ्नो खुसीको अवसरलाई असहाय बालबालिकासँग बाँडेर मनाउने भण्डारीको प्रयास प्रशंसनीय रहेको बताउनुभयो।

कार्यक्रममा बालबालिकालाई खाना खुवाउनुका साथै उनीहरूसँग केही समय बिताउँदै खुसी साटासाट गरिएको थियो । कार्यक्रममा सहभागी बालबालिका पनि निकै उत्साहित देखिन्थे। सामाजिक सेवामा रुचि राख्दै आउनुभएका शाखा प्रबन्धक भण्डारीले आगामी वर्षहरूमा पनि आफ्नो वार्षिकोत्सव यस्तै सामाजिक तथा मानवीय काम गरेर मनाउने बताउनु भएको छ ।

आफ्नो व्यक्तिगत खुसीलाई असहाय तथा अनाथ बालबालिकाको मुहारमा खुसी ल्याउने माध्यम बनाउने भण्डारीको यो कार्यलाई सहभागीहरूले सकारात्मक र अनुकरणीय कामका रूपमा लिएका छन् ।