पुनर्वास–६ मा न्यायिक समितिको सार्वजनिक सुनुवाइ, सेवा सुधारमा जोड दिन माग । 

कञ्चनपुरको पुनर्वास नगरपालिकाको न्यायिक समितिले आर्थिक वर्ष २०८२/८३ मा न्यायिक समितिबाट प्रवाह गरिएका सेवा, सुशासन, न्यायिक गतिविधिको प्रभावकारिता, सामाजिक उत्तरदायित्व, जवाफदेहिता तथा पारदर्शितासम्बन्धी सार्वजनिक सुनुवाइ कार्यक्रम सम्पन्न गरेको छ। पुनर्वास–६ स्थित जीवनज्योति माध्यमिक विद्यालयको सभाहलमा आयोजित कार्यक्रममा न्यायिक समितिले आर्थिक वर्षभरिका गतिविधि तथा सेवा प्रवाहबारे जानकारी गराएको हो।

कार्यक्रममा न्यायिक समितिका सदस्य केशव सार्कीले आर्थिक वर्षभरि सम्पादन गरिएका कार्य, दर्ता भएका उजुरी, मेलमिलाप तथा न्याय सम्पादन प्रक्रियाबारे जानकारी दिनुभयो। उहाँले न्यायिक समितिलाई थप प्रभावकारी, सहज र नागरिकमैत्री बनाउने उद्देश्यका साथ काम भइरहेको बताउनुभयो।

कार्यक्रममा बोल्दै पुनर्वास–६ का वडाध्यक्ष मित्रसिंह लामाले सार्वजनिक सुनुवाइले नागरिकका गुनासा र सुझावलाई प्रत्यक्ष रूपमा सुन्ने अवसर प्रदान गर्ने बताउनुभयो । उहाँले स्थानीय सरकारलाई पारदर्शी, उत्तरदायी र जनमुखी बनाउन सबै पक्षको सहकार्य आवश्यक रहेको धारणा व्यक्त गर्नुभयो ।

न्यायिक समितिकी संयोजक तथा उपप्रमुख भुलिया कुमारी रानाले स्थानीय स्तरका विवादलाई मेलमिलाप र कानुनी प्रक्रियामार्फत समाधान गर्दै आएको बताउँदै नागरिकबाट प्राप्त सुझावका आधारमा सेवा प्रवाहलाई अझ गुणस्तरीय र विश्वासिलो बनाइने प्रतिबद्धता व्यक्त गर्नुभयो ।

कार्यक्रममा जनप्रतिनिधि, कर्मचारी, सरोकारवाला निकाय तथा स्थानीय नागरिकको सहभागिता रहेको थियो । कार्यक्रमको आयोजना पुनर्वास नगरपालिकाले गरेको थियो भने सहजीकरण नेपाल सृजनशील विकास तथा संरक्षण समाजले गरेको थियो।